Eamiálbmogiid filbmaguovddáš Skábma
Eamiálbmogiid filbmaguovddáš Skábma mihttomearrin lea ovddidit sámi filbmasuorggi sihke lasihit ja lávdadit sámegielat ealligovva- ja av buvttadeami. Filbmaguovddáža doaimma vuolggasajit leat sihke ealáhuslaččat ja kultuvrralaččat. Guovddáža mihttomearrin lea láhčit sámeguvlui doaibmaneavttuid filbmaindustriijai, mii buktá boaittobeale guovlluide ođđa bargosajiid ja jáhku boahttevuhtii. Mihttomearrin lea maiddái ovddidit suorggi riikkaidgaskasaš eamiálbmogiid ovttasbarggu.
Eamiálbmogiid gaskavuođas medias ja erenomážit ealligovas leat máŋga barggut. Ealligovat sáhttet veahkehit jávki giela ja kultuvrra ealáskahttimis, ovdanbuktit servodaga boasttovuođaid, iktit boastto ovdagáttuid eamiálbmogiid birra ja ovddidit servvolašvuođa sierra eamiálbmogiid gaskkas.
Filbmaguovddáš Skábma ordne filbmasuorggi dáhpáhusaid, dego kurssaid, logaldagaid ja filmmaid čájehemiid, bargamiin ná sámefilmma dovddusin. Skábma doarju sámefilmmaid ja av-buktagiid plánema, ovddideami ja buvttadeami ee. rávvemiin ja máhtu buoridemiin. Guovddáš ovddida filbma- ja mediabajásgeassima ja geahččala buoridit mánáid ja nuoraid sámegielat ealligovvafállama ee. dubbema bokte.
Filbmaguovddáža doaibma buorida ealligovvadáidaga bargama eavttuid sámeguovllus ja rahpá vejolašvuođaid sámefilmma lávdadeapmái riikkaidgaskasažžan ja kultuvrra viidásabbot juohkimii. Ealligovva gaskoapmin fállá árbevieru oktavuođas modearna vuogi iežas kulturdieđu vurkemii ja sirdimii ja maiddái ođđa muitalusaid ráhkadeapmái, ja dan láhkai veahkeha sámekultuvrra seailuma eallin ja nanusin. Sámegielat ealligovat buoridit maiddái gielalaš dásseárvosašvuođa ollašuvvama sihke ovddidit sámegielaid ealáskahttima.
Eamiálbmogiid filbmaguovddáš lea fárus ordnemin ja ovddideamen Skábmagovat -filbmafestivála. Skábmagovat -festivála lea dehálaš forum sámi ealligovvaráhkadeaddjiide ja doaibmá máŋgga sámefilmma vuosttaseahkeda báikin. Mánáid ja nuoraid festiválain leat fállun ealligovvačájáhusat ja mediabargobájit. Eanet festivála birra: www.skabmagovat.fi.
Skábma ordne ealligovvačájáhusaid Sámekulturguovddáš Sajosa auditorias Anáris sihke eará báikkiin sámeguovllus ovttas eará báikkálaš doaibmiiguin. Filbmaguovddáš juohká dieđuid sámiin ja eamiálbmogiid filmmain riikkaidgaskasaš filbmafestiválaide, dáhpáhusordnedeaddjiide ja dieđujuohkkiide sihke kuratere čájáhusaid maiddái iešguđetlágan dáhpáhusaide.
Filbmaguovddáža doaibma ruhtaduvvo sámi dáidaga ja kultuvrra ovddideapmái dárkkuhuvvon mearreruđain, mii boahtá oahpahus- ja kulturministeriijas.
Váldde oktavuođa
Tarja Porsanger
Plánejeaddji, Álgoálbmogiid filbmaguovddáš Skábma
