Sámegielaid gáiddusoahpahusa fidnu
Sámegielaid gáiddusoahpahusa pilohttaprošeavtta jođiha Ohcejoga gielda ja koordinere Sámediggi. Prošeakta álggii jagis 2018, ja dan ruhtada oahpahus- ja kulturministeriija.
Prošeavtta ulbmilin lea čielggadit sámegielaid oahpahusa dárbbu ja dili sámiid ruovttuguovllu olggobealde, sámegielaid gáiddusoahpahusa pedagogalaš ja teknihkalaš čovdosiid, čállit gáiddusoahpahussii heivvolaš oahppoplána guđege sámegiela várás ja addit sihke vuođđooahpahusa ohppiide ja logahaga studeanttaide sámegiela oahpahusa fierpmis.
Lohkanjagis 2025–2026 prošeavttas fállojuvvo sámegielaid (anáraš-, nuortalaš- ja davvisámegiela) gáiddusoahpahus sámeguovllu olggobealgielddaide guokte vahkkodiimmu sullii 190 oahppái ja studentii 120 iešguđet skuvllas. Dát oahpahus lea vuođđooahpahusa ja logahatskuvlejumi dievasmahtti sámegiela oahpahus. Prošeavtta loahpalaš mihttomearrin lea láhčit sámegiela oahpahusa gáiddusoahpahussan nu máŋga sámeoahppái go vejolaš ja dán lassin prošeavtta vásáhusaid vuođul hukset eavttuid sámegielaid gáiddusoahpahusa stáđásmahttimii.
Sámegielaid oahpahussii laktásit iešguđegelágan hástalusat. Ođđa gáiddusoahpahusvugiid berre almmatge ovddidit, vai kvalitehtalaš oahpahusa lea vejolaš fállat maiddái boahtteáigge sámi álbmogii, mii lea ásaiduvvan Suomas ain viidát. Sámeoahpahusa resurssat leat bieđgguid miehtá riikka, ja daid koordineren ja čujuheapmi guovlluide, main oahpahus dárbbašuvvo, lea erenomáš dehálaš. Dáinna ládje sihkkarastojuvvo vuoigatvuohta giela oahppamii ja vejolašvuohta oažžut sámegielat bargiid ja doaibmiid servošii maiddái boahtteáigge.
