Sámemusihkkaguovddáš
Sámedikki vuollásažžan doaibmi sámemusihkkaguovddáža dárkkuhussan lea doarjut árbevirolaš sámi musihkkavugiid (luohti, leuʹdd ja livđ) seailuma ja viidásabbot ovdáneami sihke doarjut ja ovddidit modearna sámemusihka.
Sámemusihkkaguovddáš ordne sámemusihka oahpahusa, fállá rámaid sámemusihka buvttadeapmái, ovddida sámi musihkkačehppodaga ja ordne sámemusihka konsearttaid sihke eará dáhpáhusaid bargamiin dan láhkai sámemusihka dovddusin. Viidát guovlluide olli doaibma, oassálastinvejolašvuohta ja sámemusihka olahahttivuohta leat guovddáš sajis sámemusihkkaguovddáža doaimmas.
Musihkkadáhpáhusat ja konsearttat sámeguovllus ja dan olggobealde fállet sámeservošii vejolašvuođa návddašit musihkkakultuvrras ja nuppe dáfus dat ovddidit sámekultuvrra dovddusvuođa ja diđolašvuođa lassáneami váldoálbmoga gaskavuođas. Dan lassin konsearttat ja dáhpáhusat veahkehit sámeartisttaid kreatiivvalaš barggu ja buvttadeami juohkima.
Deháleamos jahkásaš dáhpáhus lea eamiálbmogiid musihkkafestivála Ijahis Idja, mii ordnejuvvo Anáris borgemánus. Sámemusihkkaguovddáža plánejeaddji doaibmá dáhpáhusa buvttadeaddjin ja guovddáš lea muđuige guovddáš rollas dáhpáhusa lágideamis.
Sámemusihkkaguovddáš lea Sámekulturguovddáš Sajosa aktiivvalaš doaibmi. Sajos fállá fiinna rámaid Sámemusihkkaguovddáža doibmii. Sámemusihkkaguovddáš ordne Sajosis konsearttaid ja eará dáhpáhusaid, mat laktásit musihkkii.
Sámemusihkkaguovddáža doaimma stivre Sámedikki stivrra jahkásaččat dohkkehan doaibmaplána ja doaimma ruhtada Oahpahus- ja kulturministeriija.
Váldde oktavuođa
Oula Guttorm
Plánejeaddji, Sámemusihkkaguovddáš
