Sämikielâi káidusmáttááttâs
Sämikielâi káidusohtâvuođâid kevttee máttááttâs piiloothaahâ lii Ucjuv kieldâ jođettem já Sämitige koordinistem haahâ, mon olášuttemäigi lii 1.8.2018–31.8.2023. Haavâ ruttâd máttááttâs- já kulttuurministeriö.
Sämikielâi káidusmáttááttâs piiloothaahâ lii haahâ, mon joođeet Ucjuuvâ kieldâ já koordinist Sämitigge. Haavâ aalgij ive 2018 já tom ruttâd máttááttâs- já kulttuurministeriö. Haahâ lii finnim jotkâruttâdem luuhâmihán 2023-2024. Haavâ ruttâdeijee, máttááttâs- já kulttuurministeriö, lii liijká čonâdâttâm kuulmâ ive hahâááigán ađai ive 2026 räi.
Haavâ ulmen lii karttiđ sämikielâi máttááttâs táárbu já tile sämmilij päikkikuávlu ulguubeln, sämikielâi káidusmáttááttâs pedagoglijd já teknisijd čuávdusijd, čäälliđ káidusmáttááttâsân hiäivulii máttááttâsvuávám jieškote-uv sämikielâ várás já adeliđ sehe vuáđumáttááttâs uáppeid já luvâttuv uáppeid sämikielâ máttááttâs viermist.
Luuhâmive 2023–2024 haavâst fálloo sämikielâi (anarâš-, nuorttâlâš- já orjâlâškielâ) káidusmáttááttâs sämikuávlu ulguupele kieldáid kyehti okkotijme. Taat máttááttâs lii vuáđumáttááttâs já luvâttâhškovlim tievâsmittee sämikielâ máttááttâs. Haavâ lopâlâš mittomeerrin lii adeliđ sämikielâ máttááttâs káidusmáttááttâssân nuuvt maaŋgâ sämiuáppei ko máhđulâš já finniđ, haavâ puátusij já feeriimij vuáđuld, sämikielâi káidusmáttááttâs stäđisin oles Suomâst.
Sämikielâi máttááttâsân lahtâseh jieškote-uvláván hástuseh. Uđđâ káidusmáttááttâsvuovijd lii kuittâg pyeri ovdediđ, vâi kvaliteetlâš máttááttâs lii máhđulâš faallâđ meiddei puátteevuođâst säämi almugân, mii lii asâidum Suomân vijđáht. Sämimáttááttâs resurseh láá piäđgui miätá riijkâ, já tai koordinistem já čujottem kuávloid, main máttááttâs tarbâšuvvoo, lii eromâš tehálâš. Tain naalijn visásmittep vuoigâdvuođâ kielâ oppâmân já máhđulâšvuotâ uážžuđ sämikielâlijd pargeid já tuáimeid siärvusân meiddei puátteevuođâst.
