Sámediggi nammadii ođđasit jagi 2023 válggain vástidan válgalávdegotti
Sámediggi čoahkkanii bearjadaga 12.4. válgabaji nuppi dievasčoahkkimii Anáris. Sámediggi dohkkehii čoahkkimisttis Sámedikki válgabaji doaibmaprográmma 2024–2027, Sámedikki almmolašdoarjaga bušeahttaevttohusa jahkái 2025 ja nammadii ođđasit válgalávdegotti vággaid várás, mat ordnejuvvojit ođđasit geassemánus.
Sámedikki dievasčoahkkin 12.4.
Sámedikki dievasčoahkkin dohkkehii lasáhusaiguin evttohusa Sámedikki válgabaji doaibmaprográmman 2024–2027. Vuođuštussan stivrra evttohussii lei, ahte doaibmaprográmma veahkeha Sámedikki doaimma stivremis ja vuoruheamis ođđasit ordnejuvvon válggaid rádjai. Sámedikki bargu ii sáhte bisánit válggaid ođđasit ordnema vuordima dihte.
Sámedikki čoahkkin dohkkehii maiddái Sámedikki almmolašdoarjaga bušeahttaevttohusa jahkái 2025 evttoheami várás vuoigatvuođaministeriijai. Bušeahttaevttohus lea hápmejuvvon doaibmaprográmma vuoruhemiid vuođul ja das lea váldon vuhtii stáhta čavga ruhtadilli.
Okta min deháleamos evttohusain lea oažžut ruhtadeami EU-áššiid ovddideapmái, muitala Sámedikki ságadoalli Pirita Näkkäläjärvi.
– Sámediggi vuoruha EU-áššiid iežas riikkaidgaskasaš politihkás. Mii sávvat EU:s doarjaga earet eará sámeguovllu eallinfámu ovddideapmái ja dálkkádatrievdamii vuogáiduvvamii buot sámi árbevirolaš ealáhusaide, dadjá ságadoalli Näkkäläjärvi.
Ovddit válgalávdegoddi nammaduvvui ođđasit
Dievasčoahkkin nammadii stivrra evttohusa mielde jagi 2023 válggain vástidan válgalávdegotti ođđasit ovtta várrelahtu nuppástusain. Mearrádus lei ovttamielalaš, muhto áirasat Pigga Keskitalo eanodagas ja Anu Avaskari Anáris guđiiga sierraoaivila.
Válgalávdegoddái válljejuvvon lahtut ja várrelahtut leat Aslak Pieski Ohcejogas (várrelahttu Niilo-Heikki Aikio, guhte válljejuvvui ovddit várrelahtu Ilmari Tapiola sadjái, gii ii lean šat geavahusas persovnnalaš siva geažil); Kirsti Saijets (ovd. Kustula) anárašgiela giellajoavkkus Anáris (várrelahttu Marko Tervaniemi); Tauno Haltta nuortalašgiela giellajoavkkus Anáris (várrelahttu Helmi Haataja); Juha Magga Eanodagas (várrelahttu Juhan-Oula Näkkäläjärvi) ja Petra Magga-Vars Soađegili Vuohčus (várrelahttu Helena Mäcklin).
– Fuomášumi veara lea, ahte stuorámus oassi sámediggeáirasiin geavahii čoahkkimis doarjjasáhkavuoru válgalávdegoddái. Sáhkavuoruin geardduhuvvui oaidnu das, ahte válgalávdegoddi lea ovddit baji mearrádusain eandalii bealuštan sámiid iešmearridanrievtti álgoálbmogin, dadjá ságadoalli Näkkäläjärvi.
Dievasčoahkkimis dollojuvvui maiddái sáttaságastallan arkeologalaš kulturárbevieru guoski láhkaásaheami ođasmahttimis.
Lassedieđut:
Pirita Näkkäläjärvi
Ságadoalli
044 753 3766
pirita.nakkalajarvi@samediggi.fi
