Legal terminology of administrative laws in the Northern Sámi in Finland and Norway -haʹŋǩǩõs
Sääʹmteʹǧǧ lij vuäǯǯam EU Interreg Aurora haʹŋǩǩõsteäggtõõzz juridiikk terminologia ooudâs viikkmõʹšše tâʹvvsääʹmǩiõʹlle. Haʹŋǩǩõõzz täävtõssân lij oouʹdeed tâʹvvsääʹmǩiõl vuõiggâdvuõđlaž vaaldâšmterminologia säʹmmlai vuõiggâdvuõttstaan raavummšen. Haʹŋǩǩõõzz täävtõssân lij lââʹssen ainsmâʹtted vaaldšemlaaʹjji jåårǥlõõzzi kvaliteʹtt da õõutnâʹstted sääʹm vuõiggâdvuõđlaž ǩiõl pâʹjjel raaji. Haʹŋǩǩõõzzâst ǩiččlââʹttet viikkâd ooudâs vaaldšemvuõđlaž vuõiǥâsteermid jåårǥlââʹtteeʹl Taarr da Lääʹdd kõskksa vaaldâšmlääʹjj tâʹvvsääʹmǩiõʹlle. Haʹŋǩǩõõzz poodd kaartʼtet še Taarr da Lääʹdd vuõiggâdvuõđlaž instaansi tâʹvvsääʹm vuõiǥâsterminologia taarbid.
Vuõiǥâsterminologia ooudâsviikkmõš lij vääžnai, ǥu tõt oouʹdad jm. tääʹrǩesvuõđ, čiõlggvuõđ, vuõiggâdvuõttsuõj, saakkummuž viõkkšõsvuõđ, lääʹjj jääʹǩǩtummuž, vuõiggâdvuõđlaž vuõiggâdvuõđi seillmõõžž da vuõiggâdvuõttvueʹjj õhttnažvuõđ. Fiʹttjeeʹl da ââʹneeʹl vuõiǥâsterminologia viõkkšânji persoon da instituutio vueiʹtte oouʹdeed vuõiǥâsriâžldõõǥǥ ceâlaivuõđ da vuõiggvuõđmeâldlažvuõđ.
Haʹŋǩǩõsäiʹǧǧ lij 1.5.-31.12.2024. Projeʹktt-tuâjjliʹžžen haʹŋǩǩõʹsse lij vaalšum OTM da ǩiõlljåårǥlõʹtti Anne Nuorgam. Haʹŋǩǩõõzzâst vaʹsttad Lääʹdd Sääʹmteʹǧǧ õõutsââʹjest Sääʹm jieʹllemvueʹǩǩ- da tuʹtǩǩeemkõõskõõzz (Sámi ealáhus- da guorahallanguovddáš SEG) in.
Tâʹvvsääʹm ââʹnnmest vuõiggâdvuõđlaž organisaatioin vaʹǯǯtõõzz Lääʹddjânnmest da Taarrjânnmest
Sääʹmteʹǧǧ da Sääʹm jieʹllemvueʹǩǩ- da tuʹtǩǩeemkõõskõs (SEG) lie čõõđtam kõõjjõõzz, koonn täävtõsân leäi kaartʼted veʹrǧǧniiʹǩǩi da vuõiǥâs-sueʹrj organisaatioi taarbid tâʹvvsääʹmǩiõl ââʹnnma Lääʹddjânnmest da Taarrjânnmest. Kõõjjõs leäi vueʹssen 1.5.-31.12.2024 čõõđtum Interreg Aurora teäggtem Legal terminology of administrative laws in the Northern Sámi in Finland and Norway -haʹŋǩǩõõzzâst. Haʹŋǩǩõõzz täävtõsân lij leämmaž õõuʹdeed sääʹmǩiõllsaž vuõiǥâsterminologia da õõuʹdeed sääʹmǩiõl sââʹj veʹrǧǧneǩsaaǥǥtummšest.
Kõõjjõõzz puäđõõzz čuäʹjte, što håʹt måtmin organisaatioin ââʹnet tâʹvvsääʹm äʹššǩiiʹrjin da neʹttsiiskõõzzin, lie jåårǥlâʹttem- da tuʹlǩǩeemtaarb õinn miârkteei. Jeeʹrab tarbb lij vaaldšmallaš tuʹmmstõõǥǥi, lomaakki da teâđtõsmateriaali vuäǯǯmõõžžâst tâʹvvsääʹmǩiõʹlle. Organisaatioin lie še veiddsânji tobdstum škooultõstaarb sääʹmǩiõl da kulttuur fiʹttjummša. Jåårǥlâʹttemtaarbid vaʹsttummuš kaiʹbbai, što vuäǯǯat vaaldšmallaž lääʹjjšiõttummuž jåårǥlõttum tâʹvvsääʹmǩiõʹlle, mii peäʹlstes kaiʹbbai sueʹrj terminologia õõudâsviikkmõõžž tâʹvvjânnmallaš õhttsažtuâjast.
Kõõjjõõzz vuâđald lij seʹlvv, što sääʹmǩiõʹlle taʹrjjuum kääzzkõõzz jie veâl tiuddu õõutverddsen. Haʹŋǩǩõs čuäʹjat šuur perstummuž juätkkõõuʹdummša da vueiʹtlvaž pueʹtti tâʹvvjânnmallaš sääʹm vuõiǥâsterminologiaprojektta.
Eŋgglõsǩiõllsaž kõõjjõõzz raportt lij lookkâmnalla tääiʹben
Haʹŋǩǩõs lij puuttâm 31.12.2024.
Lââʹssteâđ:
Anne-Kirste Aikio, ǩiõllstaanpiisar
010 839 3155, 010 839 3177, 010 839 3174
anne-kirste.aikio@samediggi.fi
