De!2-haʹŋǩǩõs
Sääʹmteeʹǧǧ da sääʹmvuuʹd kooʹddi õhttsaž De!2-haʹŋǩǩõs juätkk tåimmʼmõõžžâs.
Haʹŋǩǩõõzz ođđ tuâjjliʹžžen lij vaalšum Čeʹvetjäuʹrrneǩ sosionoom Iirâšǩ Fofonoff. Tuâjjla tuâjjan lij sääʹmǩiõllsa da sääʹmkulttuur meâldlaž nuõrituâj ooudâsviikkmõš sääʹmvuuʹd kooʹddin haʹŋǩǩõsplaan meâldlânji õõutveäkka Sääʹmteeʹǧǧ nuõrisuåvtõõzz da haʹŋǩǩõõzz ohjjeemjooukin.
-Muʹst lij ǩiõččlâsttmõš nuõrivuiʹm tåimmʼmõõžžâst da vuârdam teâđast älššas miõlin še tõn, što mon jiõčč da mij puk vuäǯǯap noorõõttâd da vuõinnlõõttâd sääʹmvuuʹd juõʹǩǩekksai nuõrivuiʹm. Nuõrin liâ jiânnai toolkvâs jurddi di haall leeʹd vuäzzliʹžžen jeeʹres õutstõõzzivuiʹm. Tuäivam, što haʹŋǩǩõõzz jäʹrjstem nuõri jeäʹǩǩespõõʹji mieʹldd še nuõri identiteeʹtt ravsme, tuʹmmai Iirâšǩ Fofonoff
Haʹŋǩǩõõzz tåimmʼmõš jäʹrjstet sääʹmnuõri tuõivvji vuâđald. Haʹŋǩǩõõzz vuõssmõs pââʹjest čõõđteš kõõjjõõzz, koin kaartʼteš nuõri tuõivvjid sääʹmǩiõllsaž âsttääiʹj tåimmʼmõõžžâst. Tuõivvjin kuâsttje jäänmõssân äʹrbbvuõtt-teâđ serddjummuš, liikkummuš da ålggõõllmõš. Täk da jiânnai jeeʹres tåimmʼmõõžž liâ pueʹttmen jeeʹres paaiʹǩin sääʹmvuuʹdest. Lââʹssen tuâjjlaž vuässââtt nuõri jeäʹǩǩespõõʹjid sääʹmnuõri ougglõsnuõrisââʹjest Discord pääiʹǩ. Ougglõsnuõrisââʹjest vuäitak lookkâd lââʹzz tääiǥ-aa.
Haʹŋǩǩõõzz tåimmʼmõõžž vuäitak seuʹrrjed sosiaalʼlaž mediast haʹŋǩǩõõzz Instagram-seeidain, Snapchat, TikTok da Whatsapp-kanaal pääiʹǩ. Tåimmʼmõõžžâst teâđtet še Nuõrisuåvtõõzz sosiaalʼlaž mediain.
Instagram: de_astoaiggedoaibma
Snapchat: de_astoaigge
Tiktok: de_astoaiggedoaibma
Whatsapp-kanaal: de_astoaiggedoaibma
De!2- sääʹmǩiõllsa nuõrituâj õõudâsviikkmõš sääʹmvuuʹd kooʹddin -haʹŋǩǩõõzzâst õõudâsviiǥǥât sääʹmǩiõllsa da -kulttuur meâldlaž nuõrituâj sääʹmvuuʹd kooʹddin. Haʹŋǩǩõõzzâst õhttsažtuâjjkueiʹmmen liâ sääʹmvuuʹd kooʹddi lââʹssen Sääʹmvuuʹd škooultõskõõskõs da Nuorisokeskus Vasatokka. Sääʹmteeʹǧǧ nuõrisuåvtõs lij vuäǯǯam nuõrituâj ooudâsviikkâmhaʹŋǩǩõʹsse 55 000 € teäggtõõzz Lappi Vuʹvddvaaldâšmkonttrest. Haʹŋǩǩõs peštt eeʹjj 2026 loopp räjja.
Lââʹssteâđ
Iirâšǩ Fofonoff
De!2-haʹŋǩǩõõzz projeʹktt-tuâjjlaž
irene.fofonoff@samediggi.fi
teʹl. 044 902 8615
Saana Aikio
vs. nuõripiisar
saana.aikio@samediggi.fi
teʹl. 044 494 6200
