Sosiaalstaan
Sosiaalstaan taʹrjjad vuâđđpiʹrǧǧummuž tõin vuõʹjjin, koin ooumaž ij pââʹst tõʹst jiõčč vaʹstteed. Lääʹddjânnmest sosiaalstaan tiuʹdde piijjmõõžžâst âʹnne huõl Kela, pueʹrrvââjjamvuuʹd, tuâjteʹmesvuõttkääʹšn da jeältõk- da jeeʹres ååsktõs-stroiʹttel.
Sosiaalstaan kätt puäʹresvuõđâst, tuâjjpââʹstʼteʹmesvuõđâst, puõccmõõžžâst, tuâjteʹmesvuõđâst, päärna šõddmõõžžâst, huõlteeʹj mõõntõõzzâst, säursmâttmõõžžâst leʹbe mättʼtõõttmõõžžâst šõddâm taarb piʹrǧǧummša.
Lääʹdd sosiaalstaan kruuʹǧǧe koʹlle täujja Lääʹddjânnmest põõššinalla jälsteei da Lääʹddjânnmest tuâjast åårrai oummu. Kooi-ne vuõʹjjin ålggjânnmest åårrai ooumaž vuäitt kuullâd Lääʹddjânnam sosiaalstaan kruuʹǧǧe. Pieʹǩǩ sosiaalstaanouddõõzzin lij čõnnsest ääiʹjbu puäđõõzzid leʹbe tuõjju.
Lââʹssteâđ Kela taʹrjjeem sosiaalstaanâst
Lââʹssteâđ Lappi pueʹrrvââjjamvuuʹd taʹrjjeem sosiaalstaanâst
Jõs Kela taʹrjjeem sosiaalstaan ij leäkku riʹjttjeei, vuäitak leeʹd vuõiggõttum tiuddeei leʹbe cõggi piʹrǧǧeemtuärjjõʹsse. Lââʹssteâđ tiuddeei leʹbe cõggi piʹrǧǧeemtuärjjõõzz ooccmõõžžâst kaaunak pueʹrrvââjjamvuuʹd neʹttseeidain. Säʹmmlai dommvuuʹdest tåimm Lappi pueʹrrvââjjamvuʹvdd.
