Äʹrbb – Õhttsaž strategia kulttuurärbba da äʹrbbvuõđlaž tiõttu

Väʹlddtäävtõõzz da vaaiktõõzz

• Raaveet sääʹmvuâlǥaž da rââst raaʹji vuällai õhttsažtuâj aunnsateʹmes kulttuurääʹrb (ICH) da äʹrbbvuõđlaž teâđ staanmõõžžâst.
• Raajât õhttsaž vuâđđjurddjid kulttuurääʹrb vaʹstteemvuõđlaž âânnmõʹšše da suõjjlummša.
• Raaveet säʹmmlai jiõččmieʹrreemvuõiggâdvuõđ di aunnsateʹmes kulttuurääʹrb da äʹrbbvuõđlaž teâđ ciʹsttjeei âânnmõõžž ohjjeei vuâđđjurddjid, mieʹldd looǥǥeeʹl luõvâs da tiõttu vuâđđõõvvi õuddmiâsttmõõžž (FPIC).
• Tuärjjeet äʹrbbvuõđlaž teâđ da kulttuurääʹrb serddjummuž pueʹtti puõlvvõõǥǥid.
• Lââʹzztet teâđ da fiʹttjõõzz sääʹm kulttuurääʹrb miârktõõzzâst.
• Čiŋŋlââʹttet Lääʹdd da Taarr Sääʹmteeʹǧǧ õhttsažtuâj.

Konkreettlaž täävtõõzz da tååim

• Tuejjeet pilottinventâsttmõõžžid sääʹm aunnsateʹmes kulttuurääʹrbest da äʹrbbvuõđlaž teâđast.
• Viiǥǥât õõudårra õhttsaž vuâđđjurddjid, kookk vuâđđâʹvve sääʹmõutstõõzzi meäʹrtem taarbid, kollektiivlaž vuäʹmstemvuõʹtte da FPIC-vuâđđjurddja.
• Jäʹrjstet tuâjjpaaʹjid, kaaunõõttmõõžžid da vuârrsaǥstõõllmõõžž sääʹmõõutstõõzzivuiʹm.
• Noorât teâđ da aiccmõõžžid pueʹtti kulttuuräʹrbbtuâj tuärjjan.
• Raajât Lääʹdd da Taarr Sääʹmtiiʹǧǧi õhttsaž strateeglaž linjjummuž aunnsateʹmes kulttuurääʹrb (ICH) staanmõõžžâst da ciʹsttjeei âânnmõõžžâst.

Äʹrbb-haʹŋǩǩõs siskklââvv Sääʹm parlamentaarlaž suåvtõõzz tåimmplaaʹne da veekk õõudårra tõn täävtõõzzid sääʹm kulttuurääʹrb da äʹrbbvuõđlaž teâđ staanâm õuʹdde da õhttsaž strategia õõuʹdeem diõtt. Ruõcc Sääʹmteʹǧǧ ij leäkku haʹŋǩǩõõzz veerǥlaž kueiʹmm, leša Ruõcc peäʹl sääʹmõõutstõõzzi ǩiõččâmvueʹjj vääʹldet lokku Sääʹm parlamentaarlaž suåvtõõzz pääiʹǩ. Ruõcc Sääʹmtegga jueʹjjet haʹŋǩǩõõzz kõskksâjjsaž teâđaid da kååččaid õhttsaž noorõõttmõõžžid. Haʹŋǩǩõs vuâđđââvv UNESCO aunnsateʹmes kulttuurääʹrb suõjjlummuž kuõskki õõlmâs-suåppmõõžž vuâđđjurddjid, koid haʹŋǩǩõõzzâst suåvldet sääʹm čõõʹlmi.