Sámenuoraid dáiddadáhpáhus
Sámenuoraid dáiddadáhpáhus lea leamaš nuorra kultur- ja dáiddadahkkiid vuosttas arenan juo 1970-logu rájes. Máŋggat dáláš, sierra dáiddasurggiid dovddus sámedáiddárat leat ožžon doppe vuosttas lávddiset ja iežasgielat gehččiid. Dáhpáhus lea nannen nuoraid kultuvrralaš ja dáiddalaš astoáiggedoaimmaid ja seammás sámegiela geavaheami ja oahppama, oktiigullevašvuođa ja sápmelaš identitehta.
Dáiddadáhpáhus lea sámenuoraid iežas jahkásaš geahčadeapmi dáiddalaš máhtus
Jahkásaččat lágiduvvo máŋggadáiddalaš sámenuoraid dáiddadáhpáhus, mii čohkke oktii sámemánáid ja -nuoraid ja sin, geat leat mielde sámegielaid oahpahusas. Dáhpáhus fállá vejolašvuođa nannet giellamáhtu, čatnat oktavuođaid ja návddašit sámekultuvrras ovttas.
Sámenuoraid dáiddadáhpáhus lea movttegis ja ivdnás dáhpáhus, masa ráhkkanit miehtá jagi erenomážit skuvllain ja oahppolágádusain. Oahpaheaddjit ja bagadeaddjit barget dehálaš barggu dáhpáhussii oassálasti nuoraid arvvosmahttimis ja bagadeamis. Dáhpáhusas nuorat besset čájehit ja ovddidit iežaset dáidduid. Nuorat luhttet eanet alcceseaset go besset loaiddastit ja ožžot máhcahaga.
Dáiddadáhpáhusa dáiddašlájat molsašuddet jahkásaččat
Dáiddadáhpáhusa dáiddašlájat molsašuddet jahkásaččat. Čájeheaddji dáidaga lassin figgat roahkasmahttit oahppiid válljet iežaset kultuvrralaš ovdanbuktimii geahččaleaddji, beali váldi, árbevirolaš (nugo livđe, leu’dd, luohti ja duodji) dahje ehtalaš dáiddašlájaid. Dáiddadáhpáhus movttiidahttá mánáid ja nuoraid hutkáivuhtii ja geahččalit ođđa šlájaid. Máŋggadáiddalaš dáhpáhusa temát leamašan govvadáidda, diktagilvu, musihkkajoavkkut, ráidogovat, oanehisfilmmat, rollabiktasat, sámegákte- ja duodječájáhusat ja juoigan- ja musihkkabargobájit.
Sámenuoraid dáiddadáhpáhusas leat láven válljet ovddasteaddjiid riikkaviidosaš dáiddadáhpáhussii. Ođasmuvvan Nuori Kulttuuri -dáhpáhus ordnejuvvo juohke nuppi jagi máŋggadáiddafestiválan ja juohke nuppi jagi fas neahtas. Riikkaviidosaš dáhpáhus fállá sámenuoraide vejolašvuođa čájehit iežaset máhtu vel stuorát gehččiidjovkui ja dan bokte ovddidit dáidduideaset.
Sámenuoraid dáiddadáhpáhusas lea guhkes historjá
Sámenuoraid dáiddadáhpáhusas lea guhkes historjá ja dat lea lágiduvvon 1970-logu álggu rájes. Sámediggi lea lágidan dáhpáhusa jagi 1998 rájes. Lágideamis gudnejahttit ain guhkes árbevieruid. Dáiddadáhpáhusa neahttasiidduide leat čohkken govaid ja dieđu dáiddadáhpáhusain jagi 1994 rájes. Dáiddadáhpáhus lea máhcahuvvon miehtá sámeguovllu johtti dáhpáhussan, mas Sámedikki vuolde doaibmi guovddážat leat duohtan dahkamin dáhpáhusa ja mánát ja nuorat ráhkadit kulturdáhpáhusa dáiddalaš sisdoalu.
Dáiddadáhpáhusa lágideaddjit leat sámi mánáidkulturguovddáš Mánnu, sámemusihkkaguovddáš ja eamiálbmogiid filbmaguovddáš Skábma ovttasráđiid Sajosa bálvalusovttadagain. Dan lassin lágidemiid dáfus dehálaš oasis leat skuvllat juohke sámiid ruovttuguovllu gielddas, Sámedikki nuoraidráđđi, sámesearvvit ja sámeguovllu gielddat. Ovttasbargu Sámedikki ja skuvllaid gaskkas lea dehálaš dáiddadáhpáhusa lágideami hárrái. Dáhpáhusa ruhtada Oahpahus- ja kulturministeriija.
Oktavuođadieđut
Petra Biret Magga-Vars
Doaibmabagadalli, Sámi mánáidkulturguovddaš
Minna Lehtola
Musihkkaguovddáža plánejeaddji
Tarja Porsanger
Eamiálbmogiid filbmaguovddáža plánejeaddji
